Министерот за правда разговараше со судиите-поротници за нивните барања и надоместоците

Министерот за правда Јетон Шасивари, заедно со заменик-министерот Ален Деребан, денеска оствари работна средба со претседателката на Основниот кривичен суд Скопје, Даниела Димовска, и со судиите-поротници, на која се разговараше за предизвиците со кои се соочуваат при извршувањето на својата функција, со посебен акцент на висината на нивните надоместоци.

На средбата беше истакнато дека судиите-поротници имаат важна улога во судскиот систем, бидејќи овозможуваат активно учество на граѓаните во вршењето на судската власт и придонесуваат за транспарентноста, правичноста и зајакнувањето на довербата во судството.

Шасивари беше информиран дека Судскиот совет во јуни годинава доставил барање за измена на Правилникот за надоместоците на судиите-поротници од 2018 година, со кое се предлага зголемување на нивните надоместоци.

Во разговорите беше посочено и дека судовите се соочуваат со недостиг на судии-поротници, што претставува сериозен предизвик за непреченото функционирање на судечките совети и навременото постапување по предметите.

Од Министерството за правда соопштија дека ќе ги разгледаат доставените предлози и ќе продолжат да работат на изнаоѓање одржливи решенија за поефикасно функционирање на судскиот систем, со соодветно вреднување на улогата и придонесот на судиите-поротници во остварувањето на правдата и владеењето на правото.

Share on Facebook

Tweet

Follow us

Save