Министерството за одбрана на Хрватска се откажа од набавка на душеци кога дозна дека се од Србија

Министерството за одбрана на Хрватска (МОРХ) се откажа од набавката на душеци за касарните кога беше откриено дека фирмата со која склучиле договор ги увезува душеците од Србија.

Како што изјавија од МОРХ за „Dnevnik.hr“, целиот процес на јавна набавка мораше да се прекине, дури и иако суштински веќе беше завршен.

„За Министерството за одбрана е неприфатливо душеците за војничките кревети да се произведуваат во Република Србија и, во согласност со законските можности, ќе ја поништи таа постапка за набавка и нема да склучи договор. Во иднина за ваквите постапки за набавка ќе ги ревидира условите поврзани со местото на производство и набавка“, порачаа тие.

Фирмата која го добила договорот за набавка на 1.700 душеци за касарните е „Комфорта“ од Славонски Брод. Сепак, оваа фирма се занимава со увоз и препродажба на душеци од Србија, што доведе до поништување на процесот за јавна набавка.

За ситуацијата да добие и дополнителна доза на бизарност, од истата фирма душеци ќе набавува Министерството за внатрешни работи.

Тие со фирмата „Комфорта“ склучиле повеќе договори во вредност од 126 илјади евра, а половина од тие договори веќе се реализирани. МВР од „Комфорта“ набавува опрема за, меѓу другото, спалните соби на Полициската академија.

Share on Facebook

Tweet

Follow us

Save