Монасите од Бигорскиот манастир повторно даруваа крв: Во хуманитарната акција беа собрани 66 крвни единици

Монашкото братство на Бигорскиот манастир, заедно со бројни верници и хуманитарци, учествуваше во втората регионална летна крводарителска акција под мотото „Дарувај крв – спаси живот“, при што беа собрани 66 крвни единици.

Акцијата беше организирана во соработка со Општинската организација на Црвениот крст – Гостивар, Институтот за трансфузиона медицина и со поддршка на Црвениот крст – Дебар, а се одржа со благослов на игуменот на манастирот, епископот Антаниски Партениј.

Според архимандрит Кирил, за дарување крв се пријавиле повеќе од 70 лица, од кои 66 успешно ја дарувале драгоцената течност, додека останатите не можеле да го сторат тоа од оправдани медицински причини.

„Имавме уште една успешна крводарителска акција во Бигорски. Особено сме радосни што меѓу оние кои подадоа рака и даруваа крв, покрај членовите на монашкото братство, имаше и луѓе од различни места, различни националности и вероисповеди“, изјави архимандрит Кирил.

Од Бигорскиот манастир истакнуваат дека крводарителството е едно од најконкретните сведоштва на христијанската љубов, бидејќи претставува лична жртва и несебична грижа за непознатиот ближен.

Во текот на акцијата, монасите, заедно со останатите крводарители, придонесоа за обезбедување резерви на крв кои ќе помогнат во лекувањето и спасувањето на човечки животи. Во манастирот нагласуваат дека секоја дарувана крвна единица претставува надеж и нова можност за некој пациент.

Особено внимание привлекува фактот што во акцијата учествувале луѓе од различни етнички и верски заедници, што, според братството, е потврда дека милосрдието и хуманоста ги надминуваат сите поделби.

Игуменот на манастирот, епископот Партениј, и овој пат ја истакнал духовната димензија на крводарителството.

„Кога од љубов даруваме нешто од себе, тогаш стануваме сродници на Христа, Кој ни се дарува целиот Себеси. Крвта што денес ја дарува човекот, утре може да стане живот за неговиот брат. А секое дело со кое се спасува и утешува човечката личност е дело што го радува небото“, порачува епископот Партениј.

Од Бигорскиот манастир упатија благодарност до сите крводарители, медицинските екипи од Институтот за трансфузиона медицина, волонтерите и претставниците на Црвениот крст од Гостивар и Дебар, како и до сите што помогнале во реализацијата на акцијата.

Ова е втора крводарителна акција организирана во Бигорскиот манастир, по првата што се одржа во ноември минатата година, а од манастирот најавуваат дека ваквите хуманитарни активности ќе продолжат и во иднина.

Share on Facebook

Tweet

Follow us

Save