М-НАВ доби нови директори

Надзорниот одбор ги именуваше Хекуран Асани и Милан Кораќ на местата на Фахрудин Хамиди и Љубе Стаменковски. Следната недела тие треба да бидат впишани во Централниот регистер со што и официјално ќе ја преземат функцијата. Третиот директор во државната компанија, Хасим Деари, како што е познато ја задржа својата функција.

Разрешувањето на Хамиди и Стаменковски беше еден од условите на Синдикатот за да не стапи во штрајк. Одлуката за смена на раководството доаѓа по насоките на владата по инцидентот од 4-ти јануари кога група насилници влегоа во зградата на контрола на летање и физички се пресметаа со дел од вработените.

За инцидентот на 4-ти јануари во М-НАВ, скопското обвинителство отвори истражна постапка против осум лица за кои постои основано сомнение дека како соизвршители сториле кривично дело-загрозување на безбедноста на воздушниот сообраќај.

Од ВМРО-ДПМНЕ велат дека насилството во М-НАВ докажува дека СДС и ДУИ ниту расчистиле ниту ќе расчистат со бандитизмот. Посочуваат дека чуварската фирма којашто им отвори порти и врати од автомобилите на тепачите врз контролори за летање, во контролна кула додека десетици авиони имале прелети, во истиот период, од истите директори, добиле нов годишен договор.

За упадот во М-НАВ домашен притвор беше одреден за четири лица, меѓу кои и Беким Незири советник во М-НАВ и функционер на ДУИ.Трисест дневен притвор му одреди Кривичниот суд и на Лабинот Керими, 5-тиот од вкупно 8 осомничени. По останатите тројца се уште се трага.

Share on Facebook

Tweet

Follow us

Save