Над 1.400 луѓе во Македонија ќе гласаат на српските избори

Во Македонија се пријавиле 1.438 луѓе за гласање на парламентарните избори во Србија на 25 октомври. Најмногу гласачи од дијаспората се пријавиле во Германија и во Босна и Херцеговина, пренесува „Данас“.

Според податоците објавени на веб-страницата „упит.бирачкисписак.гов.рс“ („upit.birackispisak.gov.rs“), која ја одржува српското Министерство за државна управа и локална самоуправа, за гласање во странство се пријавени вкупно 102.147 гласачи, кои ќе гласаат на 93 избирачки места. Тоа е повеќе од двојно повеќе во споредба со претходните избори.

Најголем пораст има во Германија, каде што на претходните избори се пријавиле нешто повеќе од 6.000 гласачи. Овојпат нивниот број е речиси тројно поголем.
Во Босна и Херцеговина бројот на пријавени гласачи се зголемил од околу 13.000 на нешто помалку од 20.000. Таму се отворени и десет нови избирачки места во споредба со изборите во 2023 година.

Во Германија, пак, се отворени само две нови избирачки места, со што нивниот вкупен број достигнал осум. Поради тоа, на избирачкото место во Штутгарт, кое ги опфаќа и гласачите од други места во Германија, се пријавени повеќе од 4.000 гласачи. На шест од осумте избирачки места во земјата има повеќе од 2.000 пријавени гласачи.

Значителен пораст има и во Австрија, каде што бројот на пријавени гласачи се зголемил од нешто помалку од 4.000 на 10.484.

Во Словенија се пријавени 3.878 гласачи, а во Франција 3.023. Во сите овие земји, како и во САД, Италија и во Швајцарија, бројот на пријавени гласачи е повеќе од двојно поголем отколку на претходните избори.

Во Црна Гора се пријавени 2.872 гласачи, во споредба со 1.166 на претходните избори. Овојпат нема да бидат отворени избирачки места во Бугарија, Романија и Турција.

Share on Facebook

Tweet

Follow us

Save