Народниот правобранител: Решенија за достоинствено домување – не “раселување по кратка постапка“ по пожарите кај Вардариште

Народниот правобранител побара институциите да се откажат од идеи за присилни иселувања и наместо тоа да понудат одржливи, правно засновани решенија за домување, по изјавата на директорот на Дирекцијата за заштита и спасување (ДЗС) Стојанче Ангелов за „силово иселување“ на ромските семејства од Вардариште по серијата пожари на локацијата.

Во реакција објавена денес, канцеларијата на омбудсманот оцени дека вакви изјави ја поттикнуваат стигматизацијата и дискриминацијата и се во спротивност со Уставот, националната Стратегија за инклузија на Ромите 2023–2030 и меѓународните обврски на државата, вклучително и Европската конвенција за човекови права, Меѓународниот пакт за економски, социјални и културни права и Рамковната конвенција за заштита на националните малцинства. „Ги повикуваме институциите и јавните личности да се воздржат од изјави кои поттикнуваат дискриминација и да работат во согласност со националните стратегии, меѓународните стандарди и принципите на човековите права,“ стои во соопштението.

Правобранителот посочува дека решавањето на станбеното прашање мора да биде во согласност со човековото достоинство, со дијалог и системски пристап, во соработка со локалната самоуправа, граѓанските организации и самите жители. Стратегијата за Ромите, нагласува институцијата, како приоритет ги утврдува подобрувањето на условите за живеење, легализација на живеалишта, интегрирано урбанистичко планирање и пристап до основна инфраструктура—не „раселување по кратка постапка“.

Share on Facebook

Tweet

Follow us

Save