НАТО: Ни треба „воен Шенген“, Русија: Ќе одговориме

Кремљ денеска објави дека желбата на НАТО да создаде воена верзија на Шенген-зоната во Европа, која ќе им овозможи на вооружените сили на западната воена алијанса слободно да се движат со цел посилно да ѝ се спротивстават на Русија, ги зголемила тензиите и предизвикала загриженост.

Шефот на логистичката команда на НАТО за Европа (ЈСЕЦ), генерал-полковникот Александар Солфранк, вчера за Ројтерс изјави дека би сакал да види таква зона. „Ни истекува времето“, рече Солфранк. „Она што не го правиме во мирнодопски услови нема да биде подготвено во случај на криза или војна“, посочи тој.

ЈСЕЦ, лоциран во германскиот град Улм, го координира движењето на луѓето и материјалите на блокот низ континентот. Додека ЈСЕЦ беше основан во 2021 година за да се поедностават подготовките за потенцијална војна со Русија, неговата работа сè уште е фрустрирана од регулативите на национално ниво, објасни Солфранк.

Според него, бирократијата може да предизвика сериозно одложување на реакцијата во случај на војна со Русија. НАТО активно ѝ помага на Украина во војната со Русија, а Киев се надева дека еден ден ќе ѝ се приклучи на алијансата.

Самиот НАТО, сепак, не е во војна со Русија, а американскиот претседател Џо Бајден и другите западни лидери тврдат дека се обидуваат да го избегнат тоа поради огромниот нуклеарен арсенал на Москва.

Портпаролот на Кремљ Дмитриј Песков изјави дека Москва ќе одговори доколку овој „воен Шенген“ стане реалност. „НАТО секогаш ја сметаше нашата земја за таканаречен идеолошки непријател. Сега отворено ја смета за очигледен противник. Оваа изјава не служи за ништо друго освен за подигање на тензиите во Европа, а тоа има последици“, рече Песков.

Разговорите за создавање „воен Шенген“ уште еднаш покажуваат дека Европа не е подготвена да ги слуша легитимните грижи на Москва, туку е подготвена да ја зајакне својата безбедност на сметка на Русија, рече Песков.

„НАТО е тој што постојано ја движи својата воена инфраструктура кон нашата граница“, рече Песков.

Од крајот на Студената војна и распадот на СССР, НАТО се прошири на околу 1.000 километри на исток, примајќи ги Полска и балтичките земји во својот сојуз, со што го прошири своето источно крило на вкупно 4.000 километри.

НАТО моментално има 10.000 војници во осум борбени групи стационирани низ цела Источна Европа. Генералниот секретар на НАТО, Јенс Столтенберг, минатата година објави дека има планови за засилување на овие распоредени сили со 300.000 војници со висока готовност во резерва.

Share on Facebook

Tweet

Follow us

Save