Нафтата повторно под 100 долари, европските берзи тргнаа нагоре

Цената на нафтата повторно се спушти под границата од 100 долари за барел, додека европските берзи денеска го започнаа тргувањето со раст.

Северноморската нафта Брент во претходното тргување падна на 99,92 долари за барел, достигнувајќи најниско ниво во последните две недели. Американската ВТИ се тргуваше околу 95,33 долари за барел.

Намалувањето на цените доаѓа во услови на подобрени очекувања за снабдувањето со нафта од Блискиот Исток. Саудиска Арабија повторно го стави во функција нафтоводот Исток-Запад, кој овозможува транспорт на сурова нафта до пристаништето Јанбу на Црвеното Море и ја намалува зависноста од транспортот преку Ормускиот теснец.

На цените влијаат и сигналите од Иран дека земјата би можела повторно да го отвори Ормускиот теснец доколку САД го намалат воениот притисок и ја укинат блокадата на иранските пристаништа. Теснецот е една од најважните светски рути за транспорт на нафта.

Пониската цена на нафтата позитивно се одрази и на европските пазари. Паневропскиот индекс СТОКС 600 утрово порасна за 0,4 отсто и достигна 645,04 поени, а во плус се тргуваше и на повеќето големи европски берзи.

Инвеститорите во текот на денот ги следат и најновите податоци за деловната активност во еврозоната, кои можат дополнително да влијаат врз движењата на европските акции.

Нафтата во изминатите денови бележи значително повлекување од повисоките нивоа достигнати по ескалацијата на конфликтите на Блискиот Исток. Пазарите во моментов најмногу реагираат на секој сигнал за подобрување на снабдувањето и можност за намалување на геополитичките тензии.

Share on Facebook

Tweet

Follow us

Save