INFOMAX.MK

На денешен ден, пред точно 29 години, беше емитувана првата епизода на македонската хумористична емисија „К-15“.

Духовитите фрази и конверзации на комичното трио бргу станаа дел од популарната култура кај нас, а кратките хумористично-сатирични скечови беа најгледаната програма во сабота навечер.

Бранко Огњановски, којшто го глумеше ликот на Миле Паника, денеска објави видео на својот инстаграм-профил, во кое ги потсети своите следбеници на првиот скеч којшто го снимиле со Васко Тодоров (Тошо Малерот) и Љупчо „Бубо“ Каров (Цацко Конопишки).

„Ова е првиот скеч што јас, Бубо и Васко го имаме глумено во К-15. Првата епизода беше емитувана на денешен ден, на 23 ноември 1994 година. Денеска полниме 29 години, а догодина – 30. Кој сака, нека честита во коментари“, рече тој во видеото.

Тројцата создавачи на емисијата ја забавуваа телевизиската публика, но и упатуваа силна социјална, политичка и економска критика, особено за нелогичностите во македонското општество, етничката толеранција, стереотипите и табу-темите.

„К-15“ се емитуваше на повеќе македонски телевизии, меѓу кои А1, Сител, Канал 5, МТВ и Алфа.

Последната епизода беше емитувана на 23 март 2013 година.