На 30 март почнува судењето против Стојанче Јовановски

На 30 март (понеделник) во Основниот кривичен суд Скопје ќе започне судскиот процес против Стојанче Јовановски за случајот со самоубиството на неговата сопруга Ивана во скопско Тафталиџе.

Обвинението беше поднесено на 13 март од Основното јавно обвинителство Скопје и на обвинетиот му се ставаат на товар три кривични дела: телесна повреда како продолжено дело на семејно насилство, загрозување на сигурноста и наведување и помагање во самоубиство.

Според обвинителството, постапката се однесува на подолг временски период на психичко и физичко малтретирање, како и на настаните од 2 март, по што обвинителството оцени дека постои основ за кривично гонење. Во обвинителниот акт е опфатен и предлог за продолжување на мерката притвор поради опасност од бегство и можност да продолжи со насилнички дела.

Случајот предизвика силен јавен интерес откако по трагедијата беа отворени прашања и за институционалната заштита од семејно насилство, како и за навременото постапување на системот. Со закажувањето на првото рочиште, предметот сега влегува во судска фаза.

Share on Facebook

Tweet

Follow us

Save