Нема причина за спојување на Молдавија со Романија, нагласи романскиот претседател

Романскиот претседател Никушор Дан денес ја отфрли идејата за организирање референдум за обединување на Романија со Република Молдавија. Зборувајќи во градот Фокшани, каде што присуствуваше на настаните посветени на Денот на обединувањето на романските кнежевства, Дан рече дека таквата мерка не е оправдана сè додека „нема волја во Република Молдавија за тоа“, објавува агенцијата Агерпрес.

„Нема причина за ова сè додека нема волја во Молдавија за тоа“, рече Дан, потсетувајќи дека Романија има обврска кон Република Молдавија да ја поддржи на нејзиниот европски пат. Тој нагласи дека ова е прашање за кое граѓаните на Република Молдавија мора да имаат збор.

„Романија има обврска кон Република Молдавија да ја поддржи на нејзиниот европски пат. Ова е целта на граѓаните на Република Молдавија и властите што ги избраа. Покрај тоа, постојат и други поврзани прашања, како што се енергетиката, економската поврзаност и други. Во овој контекст, Романија ја поддржува Молдавија и ја почитува волјата на нејзините граѓани. Доколку во одреден момент нивниот став се промени, и ние ќе дејствуваме соодветно“, рече романскиот претседател.

Share on Facebook

Tweet

Follow us

Save