Нетанјаху: Ерусалим засекогаш ќе остане под контрола на Израел, Иран никогаш не бил послаб

Израелскиот премиер Бенјамин Нетанјаху изјави дека Ерусалим „засекогаш“ ќе остане под контрола на Израел, нагласувајќи дека државата Израел е „посилна од кога било“, додека истовремено „режимот во Иран е послаб од кога било“.

„Ќе продолжиме со борбата против сите закани на радикалниот ислам“, изјави Нетанјаху на церемонијата по повод Денот на Ерусалим, празник во Израел.

Според него, доколку Израел не ја започнел војната против Иран во јуни минатата година и во февруари оваа година, „Иран денес би имал нуклеарна бомба“.

„Нашите непријатели сакаат да нè уништат без исклучок. Но тие имаат уште една цел: да нè истераат од Ерусалим. Нивниот слоган ‘Патот кон Ерусалим’ го изразува нивниот злонамерен план да нè протераат од срцето на еврејската нација. Ние нема да го дозволиме тоа. Само Ерусалим под израелска власт е навистина слободен град за сите религии и народи“, изјави израелскиот премиер.

Нетанјаху исто така тврди дека Израел постигнал успеси во борбата против Хамас и Хезболах, како и против Иран.

Share on Facebook

Tweet

Follow us

Save