Нови Сад ќе издвои 80.000 евра за семејствата на настраданите во Кочани

Советниците во Собранието на Нови Сад, денеска одлучија градот да донира 10 милиони динари (околу 5 милиони денари / 80.000 евра) за помош на семејствата на загинатите во пожарот во дискотеката во Кочани.

Ова денеска, пред почетокот на седницата на Собранието на градот, го најави градоначалникот на Нови Сад, Жарко Миќин.

Парите, според Миќин, ќе бидат издвоени од буџетот на Нови Сад.

Седницата на градското собрание беше неизвесна откако синоќа влезот во зградата на општината го блокираа студенти-демонстранти, во обид да ја спречат седницата на чиј дневен ред беше буџетот на градот за оваа година. Демонстрантите ја поминаа ноќта пред објектот на Градската куќа, по што полицијата насила ги отстрани и седницата се одржа. Советниците на владејачкото мнозинство ги изгласаа сите точки на дневниот ред.

Српскиот град, покрај несреќата со падот на настрешницата на железничката станица во ноемви, поминал и низ несреќи слични на пожарот во Кочани – во два случаи, во 2008 и во 2012 година, во Нови Сад загинаа вкупно 14 млади луѓе, во запалени угостителски објекти.

Share on Facebook

Tweet

Follow us

Save