Обвинителите вчера добиле допис од МВР за полицајците кои погрешно постапиле по пријавите против Стојанче Јовановски

Јавното обвинителство за гонење на организиран криминал и корупција вчера го добило известувањето од Министерството за внатрешни работи, дека 39 полицајци погрешно постапиле во случаите во кои Стојанче Јовановски бил пријавуван за насилство врз сега почината сопруга Ивана.

„Известувањето за кое покажувате интерес е доставено до ОЈО ГОКК во текот на вчерашниот ден и истото ќе биде дадено на постапување на јавен обвинител од Специјализираното одделение за гонење на кривични дела сторени од лица со полициски овластувања и припадници на затворската полиција“, велат од Обвинителството.

Јовановски е обвинет за три кривични дела, меѓу кои и наведување на сопругата Ивана на самоубиство. Тој вчера ги призна двете кривични дела „телесна повреда“ и „загрозување на сигурноста“, но не и за „наведување на самоубиство“, дело за кое прстот го впери во својот пријател Мартин Саздов кој е сведок во предметот против него.

Share on Facebook

Tweet

Follow us

Save