Од денеска само Србија, Унгарија и Турција ќе добиваат руски гас – Прекина транзитот низ Украина

Русија запре со испораките на гас во Европска Унија преку Украина во раните часови на новата година откако истече петгодишниот договор за транзит помеѓу украинската компанија „Нафтогаз“ и рускиот енергетски гигант „Газпром“. Единствените европски држави кои ќе продолжат да добиваат руски гас се Србија, Унгарија и Турција, но преку гасоводот „Туркстрим“ во Црното Море.

Володимир Зеленски порано кажа дека „Украина нема да дозволи Русија да заработува дополнителни милијарди долари на нашата крв“ и ѝ даде на ЕУ една година да се подготви. Европската комисија (ЕК) објави дека гасниот систем на Европа е отпорен и флексибилен и дека има доволно капацитет да се справи со крајот на транзитот преку Украина.

Ова претставува крај на ерата на евтин руски гас во ЕУ. Словачка е најпогодена од ова, но ЕК кажа дека влијанието ќе биде ограничено благодарение на внимателното планирање и алтернативните извори.

ЕУ значително го намали увозот на рускиот гас од почетокот на војната во Украина, но некои членки, како Австрија и Словачка, останаа силно зависни од него, што ѝ носеше пет милијарди евра годишно на Русија.

Покрај Словачка, крајот на договорот силно ќе ја погоди и Молдавија, која не е членка на ЕУ. Таа во голема мера се снабдуваше со струја благодарение на рускиот гас, вклучувајќи го отцепениот проруски регион Транснистрија.

Share on Facebook

Tweet

Follow us

Save