Оливер Спасовски одржа предавање во австриското сојузно МВР

Со задоволство ја прифатив поканата од австрискиот колега Герхард Карнер, да одржам предавање во австриското Сојузно МВР на тема „Миграциски токови и значењето на потпишаниот договор со ФРОНТЕКС за безбедноста на европските граници”, а со цел да се споделат најновите информации со кои располага МВР, а се однесуваат на современите миграциски текови, објави министерот за внатрешни работи, Оливер Спасовски на Фејсбук.

– Пред австриските колеги ги истакнав јасно идентификуваните цели, средства и инструменти во стратешките планови на МВР на РСМ, за зајакнување на соработката со земјите во регионот и со Европската унија во целина, но и за развивање на механизмите предвидени во неодамна потпишаниот договор со ФРОНТЕКС, кој го потпишав заедно со Еврокомесарката за внатрешни работи, г-ѓа Илва Јохансон, на 26 октомври оваа година, во Скопје.

Меѓу главните приоритети на МВР во делот на миграцијата ги потенцирав продлабочувањето и одржувањето на меѓународната соработка со земјите од регионот, со земјите на транзит и со земјите на потекло, со агенциите на ЕУ и други релевантни меѓународни организации, како и преку активно учество во бројни меѓународни и регионални платформи, иницијативи и процеси.

Ги информирав австриските колеги дека во првите десет месеци од годината бележиме двојно повеќе обиди и двојно повеќе кривични дела поврзани со криумчарење мигранти во однос на истиот период лани.

Имено, заклучно со 31 октомври оваа година, забележани се 83 случаи на криумчарење мигранти, што е двојно повеќе отколку во истиот период во 2021 година, кога се забележани 44 случаи. Во истиот период регистрирани се 72 кривични дела, а против 97 лица (од кои 29 странски државјани) преземени се мерки на кривичен прогон, а во однос на илегално преминување на државната граница, до 31 октомври 2022 година забележани се приближно 17000 обиди за илегален влез во нашата држава, што е речиси ист број како и за истиот период претходната година.

И во оваа прилика ја истакнав нашата подготвеност да ги ставиме сите наши капацитети за размена на искуства, за креирање на планови и стратегии за борба против прекуграничниот транснационален организиран криминал, свесни за придобивките кои може да ги оствариме и ние како држава, но и сите земји членки на Европската унија, истакна Спасовски.

Share on Facebook

Tweet

Follow us

Save