Ормус повторно под оган: Рекорден број напади врз танкери за една недела

Најмалку 12 безбедносни инциденти со танкери биле регистрирани во и околу Ормускиот теснец од 28 септември до 5 октомври, што е најголем број во една недела од почетокот на војната со Иран, објави Ројтерс повикувајќи се на три извори од поморската безбедност.

Меѓу погодените или загрозените бродови имало танкери што превезувале сурова нафта, течен природен гас и течен нафтен гас.

Опасноста не се сведува само на директни напади. Заедничкиот поморски информативен центар, предводен од американската морнарица, регистрирал и обиди за напади, прелети со дронови, надзор и радиоповици од иранската Револуционерна гарда.

Меѓународната поморска организација на ОН во истиот период евидентирала девет инциденти. Според изворите на Ројтерс, разликата во бројките се должи на подолгиот процес за проверка и официјално заведување на случаите.

Новото зголемување на ризикот доаѓа во момент кога земјите од Заливот повторно ги зголемуваат испораките на нафта. Во дел од септември извозот дури ги надминал предвоените нивоа, но нападите и логистичките проблеми отвораат прашање колку долго може да се одржи таквата динамика.

Последиците веќе ги чувствуваат и екипажите. Дванаесет морнари беа повредени откако танкерот „Он пис“, кој пловел под панамско знаме, бил погоден од неидентификуван проектил додека минувал низ Ормускиот теснец. Единаесет од повредените се индиски државјани.

Зголемениот број напади повторно ја засилува неизвесноста околу еден од најважните светски коридори за транспорт на нафта и гас, токму во момент кога земјите од регионот се обидуваат да ги вратат испораките на повисоко ниво.

Share on Facebook

Tweet

Follow us

Save