Османи: Последен пат ќе влезе во државата секој оној кој Македонците ќе ги нарече Бугари

Последен пат ќе влезе во државата секој оној кој ќе ги нарече Македонците Бугари или ќе каже дека Македонија е бугарска, дециден е министерот Бујар Османи. Тој во интервју за „Студио 10“ на Телевизија 24 Вести уште еднаш ги повтори пораките кои вчера ги кажа и во Софија.

„Јас кажав јасно во Софија, секој што ќе дојде во Република Македонија и ќе ги предизвика граѓаните, заедниците, преку негирање на постоење на македонскиот народ, територијални претензии од типот: Македонија е бугарска, Македонците се Бугари, тоа ќе биде сериозна основа државата да не дозволи негово повторно влегување во земјава, бидејќи ние не можеме нашите граѓани да ги изложиме на таква вознемиреност“, – рече Османи.

Османи истакна дека за говорот на Џамбаски стигнала осуда и од Владата на Бугарија.

„МНР на Република Бугарија имаше нота во која што го осуди говорот на Џамбаски и изјави дека тоа не е став на Република Бугарија, дека тоа не е став на мнозинството граѓани во Република Бугарија, дека тоа не е став на бугарските институции“, рече Османи во интервјуто.

Шефот на дипломатијата Османи порача дека двете Влади ќе ги адресираат провокаторите и насилниците и тоа нема да биде обесхрабрување за Владата на Македонија и Владата на Бугарија да продолжат со позитивната агенда.

Share on Facebook

Tweet

Follow us

Save