Осум активни пожари — гори кај дивата депонија над касарната во Прилеп и кај старите гробишта

Осум пожари на отворен простор сè уште се активни низ државава, а три се ставени под контрола, од вкупно 20 регистрирани до 18 часот, соопшти вечерва Центарот за управување со кризи.

Во Сарај, кај селото Копаница, гори ниска вегетација, додека во Трново во Гостиварско и кај селата Битово, Заград и Страјане во Општина Македонски Брод огнот зафатил нискостеблеста шума, пасишта, папрат и друга ниска вегетација.

Активни пожари има и над Нежилово во Чашка, кај месноста Сватови, каде гори ниска вегетација и поединечни дрвја, како и во Копанце во Општина Јегуновце, каде е зафатена мешана шума.

Во Прилеп гори кај дивата депонија над касарната и кај старите гробишта, а пожари се регистрирани и кај охридските села Велмеј и Брежани, како и во прилепското село Црнилиште.

Под контрола се пожарите на депонијата во Делчево и кај селото Црквенец, како и огнот на потегот Моране–Вртекица–Рамни Габер во Општина Студеничани, со крак кон Палиград и кон селата Вражале и Тисовица во Општина Зелениково.

Share on Facebook

Tweet

Follow us

Save