Официјално: Украина забрани секаков увоз од Русија

Украина официјално го забрани секаков увоз од Русија поради воената операција на Москва на нејзина територија, изјави министерката за економија Јулија Свириденко.

„Денеска и официјално објавуваме целосен прекин на стоковната трговија со државата агресор. Отсега, ниту еден производ на Руската Федерација нема да може да се увезува на територијата на нашата земја“, напиша таа на Фејсбук. Таа додаде дека е направен чекор за да се осигура дека Русија нема да ги користи парите од меѓусебната трговија за финансирање на воената операција.

Русија беше еден од клучните трговски партнери на Украина пред Москва да започне операција за „демилитаризација“ на соседната земја кон крајот на февруари, со годишен увоз вреден околу 6 милијарди долари. Иако размената на стоки и услуги меѓу двете земји практично отсуствуваше во изминатите шест недели, Киев официјално не ги прекина трговските врски со Москва до оваа објава.

Во својата објава, Свириденко ги повика другите земји да го следат нивниот пример и да воведат построги економски санкции кон Москва, и покрај фактот што околу 30 земји, вклучително и САД и поголемиот дел од ЕУ, веќе ја бомбардираа Русија со повеќекратни ограничувања и забрани. Досега не е воведено ембарго за увоз на руска енергија, бидејќи многу земји, особено во рамките на ЕУ, се многу зависни од руската енергија.

„Ваквиот чекор на Украина може да послужи како пример за нашите западни партнери и да ги стимулира да ги зајакнат санкциите против Русија, вклучително и примената на енергетското ембарго и изолацијата на сите руски банки“, рече таа.

Share on Facebook

Tweet

Follow us

Save