ОЈО Скопје предложи притвор за лицето што вчера намерно ги опожари возилата на Бугарската амбасада во Скопје

Основното јавно обвинителство Скопје поведе постапка против 44-годишен скопјанец за кого постои основано сомнение дека сторил кривично дело – Предизвикување општа опасност од член 288 став од Кривичниот законик, а јавен обвинител предложи мерка притвор.

– На критичниот ден тој излегол од дома, се качил во автобус и дошол во Центар, па од бензинската пумпа во близина на бугарската амбасада наполнил бензин во пластично шише. Потоа ја преминал улицата и се доближил до двете паркирани дипломатски возила во сопственост на Амбасадата кои ги полеал со бензинот и ги запалил со запалка. Веднаш откако го предизвикал опожарувањето го напуштил местото на настанот, информира Обвинителството.

Инцидентот го осуди Владата која побара брза реакција и пронаоѓање на сторителот кој потоа за кратко време е идентификуван и приведен од страна на Министерството за внатрешни работи.

Опожарувањето на двете дипломатски возила наиде и на реакции во Бугарија.

Share on Facebook

Tweet

Follow us

Save