Парно од 15 октомври ќе има, но енергенси само до крајот на месецов

t

На само еден ден пред почетокот на грејната сезона ЕСМ уште нема лиценца за да ги снабдува скопјани со парно, гас e обезбедено за само 15 дена греење, ама од Владата уверуваат дека парно од утре ќе има, па граѓаните треба да бидат спокојни.

Енергетската криза годинава ги помеша лончињата, а скапиот гас и неизвесноста дали воошто ќе го има, стави во незавидна положба 60.000 домаќинства во Скопје кои се греат на централно парно. Голем дел од нив се вознемирени дали воопшто ќе имаат греење и какво, бидејќи многу прашања лебдат во воздух на самиот старт на сезоната.

Па така, ако до лани БЕГ го снабдуваше Скопје со парно, годинава му е одземена лиценцата бидејќи претходната сезона не успеаја да испорачаат греење. Така, сега оваа дејност ја презема државната ЕСМ, која за таа цел формираше три фирми за производство, дистрибуција и снабдување со топлинска енергија.

Ама и за да може формално да го снабдува Скопје со греење, ЕСМ прво треба да добие лиценца од Регулаторната комисија за енергетика (РЕК). На последниот ден пред почетокот на грејната сезона, од РКЕ смируваат дека во текот на денот ќе има седница за лиценците на ЕСМ за парно.

Ова е помалиот проблем во моментов. Поголемиот е, од каде ќе се обезбеди гас за да има парно, или поконкретно, по која цена. Поради руската воена инвазија врз Украина, Европа воведе санкции кон Русија кои меѓудругото се однесуваат и на снабдувањето со енергенси. Војната и санкциите ги вивнаа нагоре цените на гасот, а проблем се јави и во испораката. Така, Русија го секна гасот за повеќе држави,како на пример за соседна Бугарија поради санкциите и одбивањето на земјата да плаќа во руски рубљи, како што бара Русија. Македонските компании засега немаат проблем со ова, ама затоа пак гасот е многу скап.

Па така, според последните информации од ЕСМ, гас за парното имаат обезбедено за две недели од октомври. Тој доаѓа преку компанијата „Макпетрол“, по цена од 1.713 евра за 1000 нормални метри кубен гас.

Но што понатаму?

Од ЕСМ посочуваат дека сега многу работи зависат од компанијата ТЕ-ТО, која всушност е гасна централа за производство на струја, а како нус производ од процесот добива топлинската енергија што се користи за греење на скопјани. Оваа компанија со години е најголем производител на топлинска енергија за Скопје. Сепак, ТЕ-ТО е приватна компанија која работи на пазарни принципи, па оттаму велат дека немаат обврски во однос на грејната сезона.

„Грејната сезона е обврска на регулираните дејности од централното греење и тоа производство, дистрибуција и снабдување со топлина со кои ТЕ-ТО нема допирни точки“, појаснуваат од компанијата.

ТЕ-ТО работи само на гас, ама покрај оваа централа, греење за скопјани се произведува и во топланите кои се регулирани производители на топлина, а кои покрај на гас, може да работат и на алтернативни горива, како мазут или нафта. Со скоро сите сега раководи ЕСМ откако го презема бизнисот на БЕГ, а во ек на кризна состојба ги зема под закуп и Топланите Скопје Исток и Запад кои лани ги купи компанијата Адора Инженеринг. Од ЕСМ не кажуваат дали и колкави резерви имаат обезбедено од алтерантивните горива, како мазутот. Единствено повторуваат – гас има за 2 недели од октомври.

ИЗВОР: Радио Слободна Европа

ПОВРЗАНИ ВЕСТИ

Етиопија и Еритреја трупаат војска, расте стравот…

Етиопија и Еритреја распоредиле дополнителни сили долж…

Илон Маск: „Премногу се зборува дека Украина…

Американскиот милијардер и сопственик на компанијата „Спејс…

Путин ја презема одговорноста за нападите на…

Рускиот претседател Владимир Путин призна дека Москва…

Oбид за убиство во гостиварско Чегране

Надворешната канцеларија за криминалистички работи Гостивар поднесе…

Димовски: Србија го следи примерот на македонската…

Политичките случувања и протестните движења во Србија…