INFOMAX.MK

Седумдесет и тригодишен жител на радовишкото село Калуѓерица е приведен откако запалил оган на нива во сопственост на неговиот брат, кој потоа се проширил и предизвикал пожар што зафатил повеќе соседни имоти, а во еден момент постоела опасност да се прошири и кон околните куќи, информира Министерството за внатрешни работи.

Според полицијата, Л.М. (73) бил лишен од слобода на 8 јули околу 12:50 часот од полициски службеници од ОВР Радовиш.

„Според пријавеното, тој претходно запалил оган на нива во сопственост на неговиот брат, по што пожарот се проширил и зафатил сува трева, дел од игралиште, нива засадена со луцерка во сопственост на Ѓ.А., насад со ореви во сопственост на И.Ј. и дел од сушара за тутун во сопственост на П.В. Во еден момент постоела опасност пожарот да се прошири и кон околните куќи“, соопшти МВР.

Во пожарот нема повредени лица.

Екипи на Територијалната противпожарна единица Радовиш интервенирале и го изгаснале пожарот, а за случајот бил известен јавен обвинител.

По целосното документирање на настанот, против 73-годишникот ќе биде поднесена соодветна кривична пријава.