INFOMAX.MK

Германската министерка за надворешни работи Аналена Бербок смета дека војната во Украина може да трае со години и дека поради ова нејзината земја мора да продолжи со вооружена помош за Киев.

„Мораме да тргнеме од фактот дека на Украина ќе и треба повеќе ново оружје од нејзините пријатели и следното лето“, рече Бербок.

Таа посочи дека Украина ги брани слободата и светскиот поредок и дека Германија на таа земја ќе и дава финансиска и воена поддршка се додека е потребно.

Бербок го обвини рускиот претседател Владимир Путин дека имал „луда идеја“ обидувајќи се да ја окупира Украина за кратко време, што не се оствари.

Шефот на германската дипломатија го поддржа барањето на Украина за враќање на Крим.

„Крим и припаѓа на Украина. Нелегалната анексија во 2014 година никогаш не беше призната од светот“, подвлече Бербок.

Таа сепак предупреди и на големите последици од војната кои ќе се почувствуваат и во Германија.

“Ние ги чувствуваме последиците од енергетската војна на Путин врз нашите џебови. Социјалната поделба е дел од планот на Путин. Тоа мора да го спречиме. Тоа ќе биде трнлив пат, но дел од политичката одговорност е да се ублажат социјалните последици поради високите цени на енергијата “, предупреди Бербок.