Петмина уапсени кај американска база во Британија – полицијата истражува подготовка на терористички напад

Британските антитерористички служби отворија голема истрага откако пет лица беа уапсени во близина на RAF Fairford, една од најважните воздухопловни бази што американските сили ја користат во Велика Британија.

Инцидентот се случил во текот на ноќта, кога полицијата добила информација за три сомнителни возила кои се движеле во правец на базата. Апсењата се извршени под сомнение за подготовка на терористички акт, а властите привремено евакуирале околу 85 домаќинства во близина.

Случајот доби дополнителна тежина откако американскиот претседател Доналд Трамп изјави дека американските служби соработувале со британските власти и дека осомничените биле следени подолг период.

Според Трамп, тие наводно планирале да предизвикаат „голема штета“, иако британската полиција засега не објави детали за конкретната цел или за евентуалното оружје и експлозив што требало да бидат употребени.

RAF Fairford има особено значење бидејќи базата ја користат американските воздухопловни сили, а беше употребувана и во контекст на американските операции поврзани со војната со Иран.

Токму затоа истрагата ќе треба да утврди дали потенцијалниот напад бил поврзан со актуелните конфликти на Блискиот Исток или станува збор за друга мотивација.

Засега британските власти се внимателни со информациите, но самиот факт дека случајот го презеде антитерористичката полиција покажува дека инцидентот се третира како сериозна безбедносна закана.

Share on Facebook

Tweet

Follow us

Save