INFOMAX.MK

Македонија направи крупен чекор кон пласирање на Европското првнество во 2024 година, иако завршија само две кола од квалификацискиот циклус. Во вториот меч, попладнево, Кире Лазаров и неговите избраници остварија убедлива победа на гости кај Турција, со 36-27.

Во далечниот Ван, преку 2.600 километри од Скопје, македонските ракометари одиграа самоуверено, дисциплинирано, демонстрирајќи ги своите квалитети. Мечот го отворија фуриозно, со 9-0, запирајќи ја Турција да постигне гол, речиси, пола полувреме. Главна заслуга за тоа имаа цврстата одбрана и Никола Митревски, кој нанижа седум интервенции во првиот полчас.

Првиот гол Турција го постигна во 14. минута, но Македонија веќе имаше контролал на случувањата, држејќи ја таквата состојба и до паузата, кога водеше со 17-8. Во 40. минута Македонија првпат поведе со двоцифрена разлика, беше 24-14, а потоа настапи мало опуштање. Во наредните 10 минути постигнавме два гола, Турција се доближи на 20-26, но победата не беше доведена во прашање.

Најефикасен беше Филип Талески со седум погодоци, зад кого беше повратникот во националниот тим, Дејан Манасков со пет. Трет најдобар стрелец кај жолто-црвените беше Томислав Јагуриновски со четири голови.

И Македонија и Португалија имаат по четири бода во групата 1, наспроти Турција и Луксембург кои останаа на нула. Имајќи предвид дека пласман на ЕП обезбедуваат првите две места, а и четирите најдобри трети, јасно е дека оваа гостинска победа кај, условно, третата по ранг селекција во групата, може да биде клучна за нашата цел. Следните натпревари Македонија ги игра во март 2023, дома и на гости со Португалците.

извор: sport1.mk