Поголема безбедност за музеите и артефактите: Тошковски најави засилена соработка

Министерот за внатрешни работи Панче Тошковски денеска го посети Археолошкиот музеј во Скопје, каде што било разговарано за можностите за подобрување на институционалната соработка и зајакнување на безбедноста на културните добра.

Тошковски посочи дека неодамнешните кражби на вредни историски и археолошки предмети од музеи во повеќе европски земји се потсетник за важноста на навремените превентивни мерки и подобрата заштита на културното наследство.

„Македонија располага со исклучително богато археолошко и културно наследство, кое сведочи за долгата и разновидна историја на овие простори. Секој археолошки предмет, секој историски артефакт е дел од нашата колективна меморија и културен идентитет, богатство кое имаме обврска да го зачуваме за идните генерации“, порача Тошковски.

Според него, заштитата на културните добра не е само прашање на културата, туку и важно безбедносно прашање.

„Спречувањето на кражбите, нелегалната трговија со културни добра и другите облици на загрозување на културното наследство бараат постојана будност, превенција и координирано дејствување на надлежните институции“, нагласи тој.

На средбата било разговарано и за можностите за дополнително унапредување на соработката меѓу институциите со цел подобра превенција и поефикасна заштита на археолошките и историските предмети.

Share on Facebook

Tweet

Follow us

Save