„Политико“: САД не ги поканиле Британија, Франција и балтичките земји на разговори за иднината на НАТО

Соединетите Американски Држави не ги поканиле Велика Британија, Франција и балтичките држави на планиран состанок во Полска посветен на иднината на НАТО, објави „Политико“, повикувајќи се на шест дипломати запознаени со подготовките. Иницијативата ја предводи Елбриџ Колби, висок функционер на Пентагон задолжен за одбранбена политика.

Состанокот е замислен како работен формат за разработка на идеи за трансформација на Алијансата. Во претходните разговори учествувале Норвешка, Шведска, Финска, Полска, Германија и Холандија. Форматот неофицијално е наречен „Бергенска група“, по првата средба одржана во Берген во јуни.

Изоставувањето на клучните сојузници предизвикало прашања за критериумите за учество. Според извештајот, дипломати се загрижени дека Вашингтон создава потесен круг привилегирани партнери во НАТО, иако дел од непоканетите земји имаат значајни воени капацитети и високи одбранбени трошоци.

Колби, пак, го објаснил форматот како начин помала група сојузници побрзо да разработува предлози за целата Алијанса. Според пренесените изјави, неговата цел е зајакнување на НАТО преку практична соработка и исполнување на обврските за одбранбени вложувања.

Share on Facebook

Tweet

Follow us

Save