Поранешен таен агент на ЦИА од Косово уапсен во САД и му се заканува депортација

Американската администрација на претседателот Доналд Трамп се обидува да го депортира Блерим Скоро, 55-годишен жител на САД, роден во Косово и татко на три деца, кој тврди дека работел во тајност за американските разузнавачки служби и дека по нападите од 11 септември се инфилтрирал во Ал Каеда, објави Си-Би-Ес њуз.

Службата за имиграција и царина на САД (ИЦЕ) го уапсила Скоро на 3 август пред канцеларија за имиграција во Њу Џерси, каде што заминал за да ги обнови своите документи. Неговите адвокати побарале од федералниот суд да ја запре депортацијата, тврдејќи дека на Скоро му било ветено право на престој по повеќегодишната работа како „агент на ЦИА“.

Според податоците на ФБИ, Скоро почнал да соработува со американските власти откако во 2000 година бил затворен поради трговија со хероин. Од 2002 до 2006 година, додека ја издржувал казната во Пенсилванија, Скоро доставувал информации за лица осомничени за милитантизам. Во документите на ФБИ тој бил идентификуван како информатор во истрага поврзана со Осама бин Ладен, а дел од неговите информации биле оценети како „оперативно употребливи“ и „веродостојни“.

Откако во 2007 година бил депортиран во Косово, Скоро вели дека ЦИА му наложила да се инфилтрира во Ал Каеда. Тој тврди дека од 2007 до 2009 година работел како таен агент, патувајќи низ неколку земји и посетувајќи камп на Исламската држава во Сирија. Неговите адвокати велат дека неговата соработка им помогнала на властите да уапсат членови на Ал Каеда, Ал Шабаб и Хезболах.

Скоро вели дека неговиот таен идентитет на крајот бил откриен и дека преживеал обид за атентат, пред повторно да се врати во САД во 2014 година, по што неговиот имиграциски случај продолжил со години.

Денес Скоро работи како таксист на Стејтен Ајленд и е во брак со Американка, со која има деца. Во 2022 година, федерален судија го забранил неговото депортирање во Косово врз основа на Конвенцијата против тортура, наведувајќи го ризикот од тортура или убиство, иако со одлуката не му било дадено право на постојан престој. Неговите адвокати тврдат дека ИЦЕ ја прекршила таа заштита со обидот да го депортира без претходно да добие судска дозвола.

– Никогаш не мислев дека вака ќе ме предадат – изјави тој за Си-Би-Ес њуз од притворскиот центар во Елизабет. „Ве молам, ако умрам, сакам да умрам во оваа земја за да можат моите деца да ме погребаат“.

Неговиот адвокат Џошуа Дрател изјави дека Скоро оттогаш „водел целосно законит и продуктивен живот со своето семејство“, по, како што го опишал, „трауматичното искуство“ што го имал работејќи за САД.

Share on Facebook

Tweet

Follow us

Save