Поранешниот германски канцелар не се откажува од Путин: Украина е виновна за неуспехот на преговорите

Поранешниот германски канцелар Герхард Шредер изјави дека сака да остане во контакт со рускиот претседател Владимир Путин, и покрај тоа што Москва не се откажува од војната со Украина.

„Не сакам да се откажам од можноста да разговарам со претседателот Путин“, изјави Шредер за неделното издание на весникот „Франкфуртер алгемајне цајтунг“.

Шредер беше германски канцелар од 1998 до 2005 година, а по заминувањето од функцијата се поврза со руските енергетски гиганти Гаспром и Роснефт. Тој и Путин се пријатели долги години.

Откако избувна војната, Шредер често беше мета на критики бидејќи сè уште е во контакт со Путин и не ја осуди улогата на Русија во конфликтот.

Тој неодамна се повлече од функцијата во надзорниот одбор на руската енергетска компанија Роснефт и ја отфрли кандидатурата да биде во одборот на директори на Газпром, пренесува Јутарњи лист.

Само дипломатско решение“

„Војната може да заврши само преку дипломатски преговори. Судбината на војниците и цивилното население на Украина може да се олесни само преку дипломатско решение“, додаде тој.

Во март, веднаш по почетокот на агресијата на 24 февруари, Шредер отпатува за Москва и се сретна со Путин.

„Колку што разбрав во текот на нашиот разговор, тој е заинтересиран проблемот да се реши преку преговори“, изјави Шредер за германскиот весник.

„Како изгледа тоа решение може да се разјасни само преку преговори“, додаде тој.

Според мислењето на Шредер, јасно е дека Украина е виновна за тоа што претходните преговори пропаднаа.