По синоќешните масовни протести, Бугарската влада го повлекува нацрт-буџетот за 2026 година

Бугарската влада одлучи да го повлече нацрт-буџетот за 2026 година по синоќешните протести низ целата земја, објави порталот „Новините“.

Одлуката следеше по синоќешните протести, поради предлог-буџетот што предвидува зголемување на даноците и придонесите за социјално осигурување во приватниот сектор и насочување на повеќе средства кон државниот сектор.

Неколку десетици илјади лица учествуваа во протестите во Софија, а демонстрации се одржаа и во поголемите градови како што се Варна, Пловдив, Бургас, Стара Загора, Добрич, Сливен, Велико Трново, Шумен, Русе, Ловец, Благоевград.

Некои демонстранти се судрија со полицијата, која ги блокираше канцелариите на владејачките партии во Софија, а на протестот во Варна беа присутни и навивачи, кои организаторите ги повикаа да не придонесуваат за ескалација на ситуацијата.

Слични тензии беа забележани и во Софија, каде што демонстрантите стоеја пред бина на Плоштадот на независноста со скриени лица, а некои од нив фрлаа камења, шишиња и петарди кон полицајците.

Советот на министри формално му предложи на Народното собрание да усвои резолуција за повлекување на предлог-законот за државниот буџет, вклучувајќи ги и поврзаните предлог-закони за НЗФО и ДСО.

Владата објави дека ќе бидат повлечени и предлог-финансиските рамки за Државното социјално осигурување (ДСО) и Националниот фонд за здравствено осигурување (НЗФО), а по формалното повлекување во Парламентот, владата планира нова постапка за буџетирање.

Министерката за финансии Теменужка Петкова најави разговори со синдикатите и работодавачите со цел прилагодување на буџетот за следната година, додека опозицијата сега бара целосна оставка на владата, а не само измени во финансискиот план.

(Видео) Над 80.000 луѓе на масовни анти-владини протести во Бугарија

Share on Facebook

Tweet

Follow us

Save