По трагичната несреќа во Швајцарија, Македонија подготвена да прифати повредени

Министерот за надворешни работи и трговија Тимчо Муцунски информираше дека Македонија е подготвена да обезбеди медицинска помош по трагичната несреќа што се случи во бар во швајцарскиот скијачки центар Кран-Монтана, по која беше активиран европскиот механизам за цивилна заштита.

Како што соопшти Муцунски преку социјалните мрежи, по консултација со претседателот на Владата Христијан Мицкоски и министерот за здравство Азир Алиу, тој денеска остварил телефонски разговор со швајцарскиот амбасадор во земјава, Кристоф Зомер.

Во разговорот, министерот изразил искрено и длабоко сочувство до семејствата на загинатите, како и до народот на Швајцарија, со желби за брзо и успешно закрепнување на повредените.

Муцунски истакнал дека државата ја изразила својата подготвеност да прифати повредени пациенти и да обезбеди соодветна медицинска поддршка во македонските здравствени установи. Дополнително, доколку се појави потреба, подготвени се и македонски лекари – специјалисти, кои беа директно вклучени во лекувањето по трагедијата во Кочани, веднаш да заминат во Швајцарија и да помогнат во процесот на лекување.

„Поддршката во вакви моменти е од суштинско значење. Целосно стоиме на располагање на нашите швајцарски пријатели во справувањето со оваа трагедија“, порача Муцунски.

Share on Facebook

Tweet

Follow us

Save