Пронајдени човечки останки во Косово кој може да решат мистерија за 23 исчезнати лица

Нова трага за 23 исчезнати интелектуалци се појави во селото Мала Калуѓерка кај Зубин Поток, каде што косовските власти почнаа ископувања по откривањето човечки останки и делови од облека. Првичната судско-медицинска процена потврдила дека коските се од човечко потекло и имаат форензичко значење.

Косовскиот премиер Албин Курти изјави дека првото сомнение е оти останките можеби им припаѓаат на 23 интелектуалци од Митровица, киднапирани и присилно исчезнати на 19 април 1999 година. Тој нагласи дека идентитетот сè уште не е потврден и дека треба да се почекаат резултатите од форензичките анализи.

Специјалното обвинителство на Косово повика на внимателност и предупреди дека секое поврзување на останките со конкретни жртви е прерано пред да завршат испитувањата и идентификацијата. Локацијата досега не била целосно истражувана во потрагата по исчезнатите од војната во 1998 и 1999 година.

Во врска со случајот се уапсени двајца косовски Срби со иницијали М.Ј. и М.Б. Тие се осомничени за воени злосторства врз албанското цивилно население во регионот на Митровица и им е определено задржување. Според косовските полициски информации, истрагата се однесува на убиството на 23 цивили во 1999 година.

Албанскиот „ABC News“ објави и верзија според која случајот може да е поврзан со група од 28 лица што се движеле кон границата со Црна Гора, од кои петмина се спасиле, а 23 исчезнале. Оваа верзија засега не е официјално потврдена од обвинителството и се разликува од информациите за исчезнатите интелектуалци од Митровица.

Во Косово и натаму за исчезнати се водат околу 1.600 лица од војната. Ископувањата во Зубин Поток продолжуваат со учество на судско-медицински екипи, Комисијата за исчезнати лица, полицијата и ЕУЛЕКС.

Share on Facebook

Tweet

Follow us

Save