Путин со закана: Секој што ќе воведе забрана за летови над Украина, ќе биде соучесник

Рускиот претседател Владимир Путин денеска изјави дека Москва „ќе ја смета секоја земја што би сакала да воведе зона на забранети летови над Украина за учесник во конфликтот“.

Путин се осврна на барањата на Украина до Западот и НАТО за воведување зона на забранети летови над Украина, која ќе ја спроведуваат борбените авиони на НАТО.

Во тој случај речиси сигурно би имало воздушни судири меѓу руски и НАТО авиони, односно влегување на НАТО во отворена војна со Русија. НАТО соопшти дека воопшто не размислува за таква опција.

Путин изјави дека не се планира прогласување на воена состојба во Русија, додавајќи дека се надева дека така ќе остане, пренесе руска РИА Новости.

Таков чекор би можел да се преземе „само во случај на надворешна агресија и само во дефинирани области на воена активност“, рече Путин на состанокот со стјуардесите на „Аерофлот“, кој беше емитуван на државната телевизија.

Рускиот претседател изјави дека „работата за уништување на воената инфраструктура на Украина е речиси завршена“, објави руската државна новинска агенција РИА Новости.

Share on Facebook

Tweet

Follow us

Save