INFOMAX.MK

По закажувањето на судското рочиште за трагедијата во Кочани родителите и семејствата на сега веќе 63-те жртви соопштија дека привремено ги прекинуваат блокадите, но продолжуваат со маршевите секоја сабота, кои остануваат симбол на нивната борба за вистината. Очекуваат фер, транспарентен и непристрасен процес и одговорност за сите виновни за трагедијата.

-Ние, родителите и семејствата на починатите деца, соопштуваме дека со големо внимание ќе го следиме судскиот процес, со единствена цел – да се открие вистината и да се обезбеди правдата за младите животи што беа изгубени во трагедијата што засекогаш го промени нашето општество. Очекуваме фер, транспарентен и непристрасен процес, во кој секој што има одговорност ќе ја понесе. Нашата болка е вечна, но нашата борба е и за сите идни генерации – никогаш повеќе да не се повтори ваква трагедија. Бараме јавноста, медиумите и институциите да го следат овој процес со должно внимание, бидејќи ова не е само судење за еден пожар – ова е судење за човечноста, совеста и одговорноста – се вели во соопштението на родителите.

Кривичниот суд за на 19 ноември го закажа судскиот процес за првото обвинение што беше поднесено за кочанската трагедија. Судскиот процес ќе се одржува во судницата во Идризово а случајот ќе го води судијката Диана Груевска Илиевска.