Романија за три дена собори три дронови над нејзина територија

Борбен авион Ф-16 на Романија, утрово во 10:13 часот, собори беспилотно летало над романските територијални води во областа помеѓу Сулин и Килија.

Ова го објави претседателот Никушор Дан. Ова е трет дрон уништен од романските воздухопловни сили за три последователни дена. Дронот е неутрализиран над Црното Море, објави „Диги 24“.

Шефот на државата ја даде изјавата околу половина час по инцидентот.

„Ги поздравувам романските пилоти и копнените екипи за професионализмот, храброста и ефикасноста со која ги исполнуваат своите мисии. Со своите постапки, тие придонесуваат за заштита на националната територија и безбедноста на романските граѓани“, рече Никушор Дан.

Претседателот истакна дека првиот дрон соборен на 24 јули бил од типот Шахед, кој го користела Русија во војната против Украина. Според него, Романија ќе испрати дипломатски протест до Москва.

„Според истрагата на Главното обвинителство, дронот соборен во петок наутро (24 јули) е од типот „Шахед“, кој го користела Руската Федерација во војната против Украина. Истрагите за дронови, објавени вчера и денес, продолжуваат. Дипломатскиот протест на Романија против Руската Федерација ќе се базира на резултатите од овие проверки“, рече Дан.

Тој подвлече дека е „неприфатливо и неподносливо“ Русија да продолжи да го нарушува романскиот воздушен простор, кој е исто така и воздушен простор на НАТО и Европската Унија.

„Ваквите дејствија се неприфатливи и ние ги сфаќаме сериозно, заедно со нашите сојузници“, рече романскиот претседател.

Нешто по 10:00 часот по локално време, беше издадено ново предупредување од системот RO-Alert за северниот дел од округот Тулча. Жителите беа повикани да побараат засолниште во подрумот поради опасност од предмети што паѓаат од воздух.

Share on Facebook

Tweet

Follow us

Save