„Ројтерс“: Трамп бара Франција и Германија да ослободат дизел од резервите, за да нема забрана за извоз дизел од САД

Администрацијата на американскиот претседател Доналд Трамп побарала Франција и Германија да ослободат дел од своите вонредни резерви на дизел за да помогнат во намалувањето на глобалните цени на горивата. Во спротивно, Вашингтон би можел да воведе забрана за американскиот извоз на дизел, објави „Ројтерс“, повикувајќи се на три извори блиски до разговорите.

Според извор на агенцијата во европска престолнина, САД побарале Европската Унија да ослободи околу 120 милиони барели дизел во следните шест месеци. Барањето доаѓа во период кога Трамп настојува да ги намали цените на горивата пред ноемвриските избори за Конгресот.

Американските власти, според извештајот, се особено незадоволни од Франција и Германија, сметајќи дека двете земји не ги исполниле целосно претходните обврски за ослободување на вонредните резерви на нафта и нафтени деривати. Сепак, предупредувањето за можна забрана не значи дека таква мерка веќе е донесена.

Франција и Германија имаат значајна улога во европските стратешки резерви. Според податоците на Евростат за мај 2025 година, пренесени од „Ројтерс“, тие заедно располагале со околу 35 проценти од вонредните резерви на гасно масло и дизел во ЕУ.

Можната американска забрана предизвикува загриженост поради последиците за меѓународното снабдување. Аналитичари предупредуваат дека ограничувањето на извозот би можело да ги влоши недостигот и ценовните притисоци надвор од САД. Меѓу главните купувачи на американски дизел се Бразил, Мексико, Франција и Велика Британија, а големите американски нафтени здруженија се противат на ваквата мерка.

Share on Facebook

Tweet

Follow us

Save