САД ги преместија Рубио, Хегсет и Бесент на безбедни локации по предупредувања за можни ирански напади

Американската влада проценува дека заканата од ирански напад е исклучително сериозна, поради што неколку членови на кабинетот на претседателот Доналд Трамп се преместени на специјално обезбедени локации. Меѓу нив се државниот секретар Марко Рубио, министерот за одбрана Пит Хегсет и министерот за финансии Скот Бесент, пишува германски „Билд“, повикувајќи се на информации од израелскиот весник „Израел Хајом“.

Во исто време, според истиот извор, Трамп значително го намалил бројот на јавни настапи. Договор меѓу Вашингтон и Техеран, дури и привремен, се чини сè подалечен, а причината за тоа, меѓу другото, се разузнавачки информации што израелскиот Мосад му ги доставил на американската ЦИА.

Според наводите на „Израел Хајом“, информациите укажуваат дека Иран планира напади врз Трамп и високи американски функционери. Израелски и американски претставници изјавиле за весникот дека токму овие закани се една од клучните причини за промената на ставот на американскиот претседател во преговорите со Техеран.

Страв од напади со експлозивни дронови

Американските власти и претходно имале информации за ирански закани кон високи функционери, но најновите податоци доставени од Израел наводно укажуваат на конкретна и непосредна опасност. Меѓу можните сценарија се и напади со беспилотни летала натоварени со експлозив, против кои вообичаените безбедносни мерки нудат ограничена заштита.

Поради заканите, загрозените функционери, вклучително и Трамп, драстично ги намалиле активностите на отворено. За време на нивните јавни појавувања се применуваат засилени безбедносни мерки и се активираат специјални системи за одбрана од дронови.

Тројца министри преместени во воена база

Неколку членови на американската администрација привремено биле преместени од своите домови во објекти под воена заштита.

Министерот за финансии Скот Бесент ја потврдил иранската закана во интервју за телевизијата Си-Ен-Би-Си. Тој од својот дом во вашингтонската населба Џорџтаун бил префрлен во безбедна воена база. Бесент е задолжен за спроведување на санкциите против Иран и се смета за еден од главните архитекти на американската економска кампања против Техеран.

Во безбедна воена база биле преместени и државниот секретар Марко Рубио, кој се противи на каков било договор со Иран, како и министерот за одбрана Пит Хегсет.

Новинарите во Вашингтон во саботата известиле и за прелети на хеликоптери од првата ескадрила на американските воздухопловни сили над градот. Хеликоптерите од типот UH-1N, меѓу другото, се користат за итна евакуација на високи државни функционери.

Share on Facebook

Tweet

Follow us

Save