САД: Кинески хакери упаднале во мрежи на Сенатот, НАСА и Федералните резерви

Кинески хакери упаднале во сервери на американскиот Сенат, Министерството за правда, НАСА, Федералните резерви, Министерството за енергетика и Министерството за здравство, како и во мрежи на приватни компании во САД, соопштија американското Министерство за правда и ФБИ.

Американските власти заплениле домени на две хакерски платформи – „QScan“ и „QTRouter“, кои биле користени за масовни сајбернапади врз критичната инфраструктура и стратешките владини мрежи во САД.

Според судските документи, платформите биле развиени и управувани од кинеската хакерска мрежа „QTFY“, која работела за кинеската компанија Nanjing Xinjiuwei Network Technology. Меѓу нејзините главни клиенти, според истрагата, биле кинеското Министерство за државна безбедност и Народноослободителната армија на Кина.

„QScan“ автоматски скенирал и заразувал илјадници уреди поврзани на интернет ширум светот. Тие потоа биле вклучувани во мрежата „QTRouter“, заедно со прокси-сервери и VPS системи, со цел да се прикрие кинеското потекло на сајбернападите.

Истрагата покажала дека инфраструктурата на „QTFY“ најмалку од 2018 година била користена за упади во критични мрежи во САД и во други делови од светот.

По запленувањето на клучните домени од страна на американските власти, платформите „QScan“ и „QTRouter“ биле блокирани и престанале да функционираат.

Во заедничка операција, ФБИ и Националната агенција за безбедност (NSA) објавиле и извештај со индикатори за компромитирање, со цел организациите полесно да ги заштитат своите мрежи.

Share on Facebook

Tweet

Follow us

Save