Само мерки за претпазливост за тројцата насилници од Ченто за бруталниот напад врз малолетник

Основниот кривичен суд ги прифати предложените мерки за претпазливост за тројцата осомничени за бруталниот напад врз 14-годишното момче во скопската населба Ченто, кое беше претепано и избодено дури седум пати со нож.​На осомничените им се изречени следниве забрани и обврски:

,,​Забрана за напуштање на живеалиштето, односно престојувалиштето;​Обврска за повремено јавување кај определено службено лице или надлежен државен орган;​Привремено одземање на патна или друга исправа за преминување на државната граница;​Забрана за посетување на местото каде што се случил кривично-правниот настан; Строга забрана за приближување или воспоставување какви било контакти со оштетеното дете и со неговите родители.”

Од Основното јавно обвинителство информираат дека во меѓувреме продолжува прибирањето докази и вештачењето на пронајдените траги на теренот.

​„Истражните дејствија непречено се спроведуваат. Издадена е наредба за обезбедување на целокупната медицинска документација, се очекува наодот од медицинското вештачење, а паралелно се преземаат и други истражни мерки“, соопштија од Јавното обвинителство на РСМ.

​Крвничкиот напад се случи на 22 јуни, а Министерството за внатрешни работи , ја поднесе кривичната пријава во петокот – дури 11 дена по инцидентот. Во пријавата, случајот засега се води под правна квалификација „насилство“.

​Сепак, родителите на повреденото момче јавно реагираат и бараат случајот да се преквалификува во „обид за убиство“, нагласувајќи дека напаѓачите со себе носеле и автоматска пушка „калашников“.

Мотивот за нападот сè уште е непознат. Во зависност од резултатите од медицинските вештачења, како и од преостанатите докази кои се прибираат за целосно расветлување на случајот, јавниот обвинител има законско право да ја промени и заостри правната квалификација на кривичното дело со кое се товарат осомничените.

Share on Facebook

Tweet

Follow us

Save