Сајбер-напад врз три британски аеродроми, украдени податоци на 8,7 милиони корисници

Податоците на 8,7 милиони корисници се украдени по сајбер-напад врз три аеродроми во Велика Британија, вклучувајќи ги Манчестер и Станстед, соопшти денеска компанијата „Манчестер ерпортс груп“ (MAG).

За време на хакерскиот напад биле украдени податоци што вклучуваат адреси на е-пошта, телефонски броеви, регистарски таблички на возила и поштенски кодови, пренесува „Скај њуз“.

Компанијата објави информации за „инцидент поврзан со сајбер-безбедноста“ што ги засега аеродромите Манчестер, Станстед и Ист Мидлендс.

„Групацијата ’Манчестер ерпортс‘ беше цел на инцидент поврзан со сајбер-безбедноста, предизвикан од неовластена трета страна“, изјави портпарол на MAG.

Како што се наведува во соопштението, дошло до неовластен пристап до одредено количество кориснички податоци поврзани со резервации за паркинг, пристап до ВИП-сали и услугите „Fast Track“ (брз премин низ контрола), како и до податоци за регистрација за користење на Wi-Fi мрежата на аеродромите Манчестер, Станстед и Ист Мидлендс.

„Веднаш го ставивме ризикот под контрола и работиме со стручни советници, преземајќи соодветни чекори за заштита на нашите корисници и системи. Ги известивме надлежните органи и соработуваме со нив. Безбедноста на патниците и на воздушниот сообраќај во ниту еден момент не беше загрозена“, соопштија од групацијата MAG.

Како што додадоа, пристапениот систем не содржел банкарски податоци или информации за плаќање на корисникот.

Операциите на аеродромите и паркирањето на возилата се одвиваат непречено, објави оваа група.

Бројот на сајбер напади насочени кон јавната инфраструктура, вклучувајќи ги и аеродромите, е во пораст, според Sky News.

Share on Facebook

Tweet

Follow us

Save