Свиркачот кој ги разоткри врските меѓу Епстин и Лутник е пронајден мртов

Сајмон Андрис, поранешен британски банкар и свиркач кој помогна да се откријат наводни деловни врски меѓу американскиот министер за трговија Хауард Лутник и Џефри Епстин, почина на 57-годишна возраст во Корнвол, Англија.

Британски „Гардијан“ објави дека Андрис си го одзел животот. По неговата смрт, британскиот финансиски регулатор FCA отвори внатрешна проверка за начинот на кој постапувал со неговите пријави, додека дел од британските пратеници бараат независна истрага.

Андрис претходно работел во BGC Group, компанија со која долги години раководел Лутник. Тој тврдеше дека открил електронска комуникација од 2018 година која укажувала на деловни разговори меѓу Лутник и Епстин, иако американскиот функционер претходно тврдеше дека ги прекинал контактите со Епстин уште во 2005 година.

Прашањата за нивниот однос повторно се отворија годинава, кога Лутник пред американскиот Сенат потврди дека во 2012 година го посетил приватниот остров на Епстин со своето семејство. Посетата се случила неколку години откако Епстин веќе бил осуден за сексуално дело поврзано со малолетничка.

„Ручав со него додека бев на одмор со моето семејство на брод. Сопругата беше со мене, како и нашите четири деца и дадилката. Ручавме на островот, тоа е сè. Поминавме еден час таму“, изјави Лутник пред Сенатот.

По објавувањето на документите поврзани со Епстин, повеќе американски сенатори побараа дополнителни објаснувања од Лутник за природата и времетраењето на неговите контакти со осудениот сексуален престапник.

Лутник негира дека имало нешто несоодветно во неговите контакти со Епстин и јавно ги осуди неговите злосторства.

Андрис, пак, со години тврдеше дека британските и американските институции не постапиле соодветно по информациите што им ги доставувал и зборуваше за последиците што свиркањето ги имало врз неговата кариера и приватниот живот.

По неговата смрт, FCA соопшти дека ќе го преиспита сопственото постапување со неговиот случај.

Share on Facebook

Tweet

Follow us

Save