INFOMAX.MK

Селекторот на македонската фудбалска репрезентација, Гоце Седлоски, отворено зборуваше за разочарувањето по убедливиот пораз од Данска со 0-4 во полуфиналниот бараж за Светското првенство 2026, одигран во Копенхаген.

Седлоски оцени дека натпреварот се „скршил“ веднаш на стартот од второто полувреме, кога противникот рано го отвори резултатот и целосно го наруши ритамот на македонската селекција.

„Задоволен сум од првото полувреме, но им укажав на играчите да внимаваме да не примиме гол во првите десет минути. За жал, тоа се случи веќе во третата минута. Првиот гол нè пресече и не знам што точно се случи потоа“, изјави Седлоски.

Тој посочи дека токму сценариото од кое најмногу стравувале, играта по крилата на Данска, се покажало како клучен проблем за неговиот тим.

„Ова е тежок пораз кој боли. Данска постигнуваше голови од крилните позиции, нешто на што посебно работевме. Имавме проблем со нивните бекови кои создаваа вишок и ни правеа сериозни потешкотии“, додаде селекторот.

По овој неуспех, Македонија ќе има уште еден натпревар во баражот и во вторник ќе игра за третата позиција против поразениот од дуелот меѓу Чешка и Република Ирска, и тоа на гостински терен.