Семејството на починатиот притвореник тврди дека немал соодветна грижа во „Шутка“

Притвореникот Мирсад Пушка почина вчера во истражниот затвор „Скопје“ во Шуто Оризари, информираа од Министерството за внатрешни работи. Семејството на починатиот тврди дека тој не добивал соодветна здравствена грижа, и покрај сериозните заболувања, меѓу кои и канцер.

Адвокатот и роднина на Пушка, Асмир Алиспахиќ, на Фејсбук посочи дека Пушка, кој бил во притвор изминатите пет месеци, не примал соодветна терапија. „Човекот имаше сериозни дијагнози и требаше секојдневно да прима терапија. Во затворите нема ниту основни услови за живот, а најмалку за ваков тип на здравствена грижа“, рече Алиспахиќ.

Од МВР информираат дека вчера околу 15:30 часот Пушка побарал лекарска помош, а во 15:58 часот лекар констатирал смрт. Директорот на КПУ „Скопје“, Бобан Утковски, изјави дека и покрај обидите за реанимација, притвореникот починал, а тој бил редовно спроведуван на медицински прегледи, но не бил хоспитализиран.

Кривичниот суд потврдува дека биле известени за повеќе дијагнози, но не и за канцер, а предлог за измена на мерката притвор бил поднесен на 29 август.

Мирсад Пушка беше еден од 36 обвинети во предметот „Синдром“, кој се однесува на злоупотреби и поткуп при издавање инвалидски пензии и туѓа нега, и од април годинава се наоѓаше во притвор во Шуто Оризари.

Share on Facebook

Tweet

Follow us

Save