INFOMAX.MK

Осум лица биле пренесени во болница откако авион на „Авијанка“, кој летал од Меделин во Колумбија кон Њујорк, бил погоден од силна турбуленција и принудно пренасочен кон Мајами.

Авионот „Ербас А320“ полетал во четврток во 22:40 часот по локално време кон аеродромот ЏФК, но по околу три часа лет морал да го промени курсот и да слета на меѓународниот аеродром во Мајами.

Според податоците од „Флајтрадар24“, авионот претходно летал на височина од околу 35.000 стапки над Јамајка и Куба, а потоа за само неколку минути се спуштил за околу 25.000 стапки, односно приближно 7.500 метри.

Снимки направени од патници во кабината по инцидентот покажуваат вознемирени и повредени патници по силната турбуленција.

Противпожарната и спасувачката служба на Мајами-Дејд соопшти дека по слетувањето интервенирала поради повеќе повредени лица. Осуммина биле пренесени во болница, а најмалку едно лице било во сериозна состојба.

Авионот слетал во Мајами околу 3:30 часот наутро, наместо да го продолжи летот кон Њујорк.