Силјановска-Давкова од Анкара: Македонскиот јазик мора да се негува и пренесува на идните генерации

Претседателката Гордана Силјановска-Давкова, која престојува во Анкара по повод Самитот на НАТО, се сретна со припадници на македонската заедница во Турција во просториите на македонската амбасада.

На средбата, одржана во пријателска атмосфера, присуствуваа универзитетски професори, лекари, научници и други истакнати професионалци со македонско потекло, како и претседателката на Здружението „Иселениците од Румелија“, Севим Оздемир.

Претседателката истакна дека средбата била можност да ги слушне нивните лични приказни, во кои, како што наведе, се испреплетуваат спомените за родниот крај, грижата за зачувување на македонскиот јазик и стремежот тоа културно наследство да им се пренесе на идните генерации.

Посебно внимание било посветено на иницијативата на проф. д-р Мелахат Парс, раководителка на Катедрата по македонски јазик при Анкарскиот универзитет, за целосно етаблирање на катедрата и отворање Лекторат по македонски јазик во Анкара.

Силјановска-Давкова оцени дека оваа иницијатива претставува природен и стратешки значаен чекор, нагласувајќи дека во земја во која живее бројна заедница со македонско потекло, лекторатот ќе биде важен центар за изучување, негување и афирмација на македонскиот јазик и македонската култура.

Share on Facebook

Tweet

Follow us

Save