INFOMAX.MK

Најавената средба меѓу претставниците на Синдикатот на УПОЗ со Владата, чека на враќањето на премиерот Мицкоски од САД, велат од ССМ. Синдикатот на работниците од управата, правосудните органи и здруженијата на граѓани, во петокот поднесе формално барање за средба со него.

Минатата недела секојдневно протестираа вработените во седум министерства и две институции, бидејќи дијалогот еднострано беше прекинат од Министерството за финансии со одбивање на предложените колективни договори за додаток на плата од 30 проценти за вработените што протестираат.

-Вработените очекуваат Владата да покаже разбирање и да ја прифати оваа подадена рака од Синдикатот на УПОЗ за изнаоѓање решение. Во спротивно, повторно ќе се активираат протестите, а ќе ги искористиме и сите со закон дадени можности за изразување на незадоволството на работниците се до остварување на барањата – рече Слободан Трендафилов, претседател на ССМ.

Од УПОЗ не ја исклучија можноста и за тужба против државата, но рекоа дека прво ќе дадат шанса за продолжување на дијалогот.

-Прво ќе чекаме, ќе дадеме шанса за продолжување на дијалогот, ако не ќе ги продолжиме протестите, се размислува за одење на штрајк и за тужби до државата – се закани Трпе Деаноски, претседател на Синдикатот на УПОЗ.