Синот на норвешката принцеза осуден на четири години затвор за силување

Мариус Борг Хоиби, 29-годишниот син на норвешката принцеза Мете-Марит, е осуден на четири години затвор откако беше прогласен за виновен за две точки од обвинението за силување. Според пресудата на Окружниот суд во Осло, тој е ослободен од обвинението за две други силувања, но е осуден и за голем број други кривични дела, пишува Би-Би-Си.

Тричлена судска комисија го прогласи за виновен по две точки од обвинението. Хоиби не присуствуваше лично на изрекувањето на пресудата во судницата 250 на Окружниот суд во Осло, туку се вклучи преку видеоврска.

За време на постапката, обвинителството побара казна од седум години и седум месеци затвор. Од друга страна, адвокатите на Хоиби се залагаа за значително пониска казна од 18 месеци и најавија можност за жалба на пресудата.

Една жртва е именувана

Четирите обвинувања за силување датираат од 2018 до ноември 2024 година. Едно од наводните силувања се случило во официјалната резиденција на неговите родители на имотот Скаугум.

Во еден случај од 2023 година, тој е обвинет за сексуален однос со жена додека таа спиела, додека другите три случаи се однесуваат на сексуален напад врз жени со попреченост, што исто така се третира како силување во Норвешка. Единствената жртва што може да се именува е поранешната девојка и инфлуенсерка Нора Хаукланд, чии обвинувања дека ја удирал, ја клоцал и ја давел се дел од обвинението.

Share on Facebook

Tweet

Follow us

Save