Сијарто: Русија ќе обезбеди испорака на гас за Унгарија и покрај поскапувањето на транзитот низ Бугаријa

Русија ја увери Унгарија дека „Гаспром“ целосно ќе ги исполни своите договорни обврски за испорака на гас, и покрај намерата на Бугарија да ја зголеми цената на својот транзит низ нејзина територија, изјави унгарскиот министер за надворешни работи Петер Сијарто во интервју за телевизијата „М1“ на маргините на Меѓународниот форум „Појас и пат“ во Пекинг.

Министерот посочи дека на средбата меѓу унгарскиот премиер Виктор Орбан и рускиот претседател Владимир Путин, меѓу другото, се разговарало и за одлуката на Бугарија да ја зголеми транзитната цена на рускиот гас. На средбата присуствуваа и потпретседателот на руската Влада Александар Новак и директорот на Гаспром Алексеј Милер.
Сијарто одлуката на бугарските власти за зголемување на таксите за транзит на гас од Русија за Србија и Унгарија ја нарече „непријателска“ и „неоснована“, бидејќи „испораката на гас од Русија не подлежи на санкции“.

„Генералниот директор на „Гаспром“ не увери дека компанијата ќе продолжи да ги исполнува своите обврски, односно да ја испорача потребната количина природен гас во Унгарија во согласност со нашиот долгорочен договор“, рече Сијарто и додаде дека тоа е потврдено од вицепремиерот кој е задолжен за енергетика, а „претседателот Путин исто така јасно стави до знаење дека ќе ги исполни своите договорни обврски кон Унгарија“.
Според него, Унгарија и Србија ќе ги „усогласат своите позиции“ и „нема да ја остават одлуката на Бугарија без одговор“.

Рускиот претседател Владимир Путин и унгарскиот премиер Виктор Орбан се сретнаа во вторник на маргините на Меѓународниот форум „Појас и пат“ во Пекинг, кој се одржува од 17 до 18. октомври.

Share on Facebook

Tweet

Follow us

Save