Скопје со црн биланс: Повеќе од пет физички напади за едно деноноќие

Скопје за само еден ден заврши со серија пријави за физички напади, закани и нарушување на јавниот ред и мир. Според информациите од МВР, на 24 мај во СВР Скопје биле регистрирани повеќе инциденти на различни локации во главниот град, од Аеродром и Карпош, до Бардовци, Стајковци, Гази Баба и Трубарево.

Највознемирувачка е пријавата на 22-годишна девојка, која во 21:08 часот пријавила дека околу 21 часот на подрачјето на Аеродром била физички нападната од машко лице. Според пријавата, напаѓачот ѝ одзел личен накит и се обидел да ѝ го земе паричникот.

Во Карпош, 53-годишен скопјанец пријавил дека тој и уште едно лице биле нападнати на паркинг пред маркет, по расправија околу наплата на паркинг. Според пријавата, во нападот учествувал вработен за наплата и уште едно лице, кое употребило и тврд предмет.

Инциденти имало и во Бардовци, каде биле пријавени напади во кои се споменуваат малолетници. Еден скопјанец пријавил дека неговиот деветгодишен син бил нападнат од двајца малолетници, а потоа добил и закани од роднина на едниот од нив. Во исто време, друга пријава се однесува на 11-годишно дете, кое, според неговата мајка, по претходна расправија било нападнато од возрасно лице.

Во Стајковци, 26-годишен жител пријавил дека бил нападнат од 20-годишник од Инџиково, кој со тврд предмет нападнал и 18-годишно лице. Подоцна, во болницата „Свети Наум Охридски“ бил нарушен јавниот ред и мир со физичка пресметка меѓу повеќе лица поврзани со истиот случај. Од МВР информираат дека се преземаат мерки за расчистување на сите случаи, а по документирањето ќе следуваат соодветни поднесоци.

Share on Facebook

Tweet

Follow us

Save